Ang maong langyaw giilang si William Pampling,48, kinsa kauban sa iyang kapikas nga si Melody Pampling,49, duha ka mga hinablos nga sila si Lydia Taylor,15 ug Solomon Taylor,22.
Ang maong banay pulos lumad nga taga Perth,W.A. sa nasud sa Australia ug mianhi dinhi sa Sugbo aron magbakasyon alang sa Pasko ug kasamtangang nagpundo diha sa usa ka pension house sa maong lugar.
Sa imbestigasyon ni SPO3 Rey Cuyos, ang banay mikanaog sa giluwanang taxi padulong na balik sa maong pension house apan sa kalit lang miduol ang usa ka wala mailhing lalaki ug dayong dul-it og pusil sa nawong sa biktima.
Ang maong suspek gikatahong gibana-banang 5'6 ang gitas-on, kasarangan ang panglawas, nagsuot og dark pants, hayagon nga t-shirt ug may gipurong nga puting panapton ug armado sa wala matinong kalibre sa armas.
Matud pang Cuyos sa Banat News nga adto pang bulan sa Oktobre dinhi si Pampling ug misunod lang ang pamilya niini dinhi aron anhi magpasko.
Sumala nga si Pampling nagnegosyo og electric bikes diha sa Bohol ug duna kini kasosyo sa maong negosyo, wala pa usab matino ni Cuyos kung langyaw ba o Pilipino ang kasosyo sa biktima nga naa nagbase sa Bohol.
Si Pampling nga napusilan diha sa tuong bahin sa iyang nawong kasamtangan pang giatiman sa usa ka pribadong tambalanan dinhi sa dakbayan ug malisod pang kakuhaan og dugang impormasyon sa kapolisan kabahin sa kaso.