Walay mga armadong tawo sa Madredijos sumala pang Atienza

Kusganong gipanghimakak sa mga opisyal sa Madridejos lakip na ang mga kapitan ug barangay kagawad ang nigawas nga balita nga dunay mga armadong tawo ang nasigpatan bitbit ang tag-as nga mga armas ang magsuroy-suroy panahon sa kagabhion didto sa maong lungsod.

Nunot niini ang mga opisyal sa Madridejos mipirma og manifesto gipangulohan ni Vice Mayor Virgilio Atienza uban sa walo ka Sangguniang Bayan Member, siyam ka kapitan ug upat ka kagawad nga nihulagway nga malinawon ang maong lungsod ug walay nakit-ang armadong tawo niadtong duha ka bulan ang nakalabay.

Sa nasayran si Mayor Letty Mancio midangop ngadto ni P/Sr. Supt. Vicente Loot, hepe sa kapolisan sa probinsiya sa Sugbo bahin sa giingong mga armadong tawo dunay tag-as nga mga armas ang nasigptan sa mga baybayon didto sa Madridejos.

Si Loot mimando gilayon sa hepe sa maong lungsod sa pagsusi sa maong report, kun mga rebeldeng NPA ang nakit-an sa mga tawo.

Apan si Loot nagduda nga dili mga rebeldeng NPA ang armadong mga tawo ug iyang gituohang mga goons kini tungod kay nagsingabot ang piniliay karong Mayo sunod tuig.

Gani gibutyag ni Loot nga ang Bantayan Island walay gikatahong dunay mga rebeldeng NPA ang naglihok sa maong lugar.

Tungod niini ang mga opisyal sa maong lungsod nahibulong sa maong report nga nigawas nga dunay mga armadong tawo ang magsuroy-suroy panahon sa gabii ug ilang nasuta nga walay rekord ang police station bahin sa armadong tawo, hinungdan sa ilang pagpadala og manifesto nga dili tinuod ang pangangkon ni Mayor Letty Mancio ug matud nila malinawon ang Madridejos.