Ang gidakop giilang si William Aragon, hingkod ang panuigon ug lumad nga taga Sawang-Calero, apan diha na mag-hide-out sa usa ka gubaon nga 40 footer van diha sa may Pasil Fishport sa Suba.
Gidakop si Aragon sa grupo nila ni SPO3 Alfredo Cabildo pinasikad sa warrant of arrest nga giluwatan ni RTC branch 10, judge Soliver Peras, nga tungod sa kasong paglapas sa Akta Republika 6425.
Si Cabildo mitug-an sa Banat News nga si Aragon maoy tigbaligyaan og shabu diha sa maong lugar diin ang uban ipaagi lang sa pag-swap sa mga butang.
Sa pagsiksik sa maong van nakuhaan si Aragon og usa ka kalibre 45 pistolang walay lisensya, tulo ka magazine nga may siyam ka buhing bala, usa ka airgun nga may teleskopyo, 50 ka bala sa kalibre 22, tulo ka dagkong paketeng may sulod nga shabu, mga gamit sa pagsuyop ug pagrepak sa maong drogas.
Gisakmit usab sa kapolisan ang nagkalain-laing mga appliances lakip na ang tulo ka telebisyon, upat ka speaker-buffles, tulo ka security camera, Tag Heuer automatic nga relo, aircondition, DVD player, usa ka monitoring detector ug uban pa, ingon man ang P1,500 nga kwartang gituuhang halin ug pina-swapan sa iligal nga drogas.
"Pinerenda man kuno ning uban, pero way siguro sad kay mao man gud ning negosyo sa ilegal nga drogas, swap-swap ra man na," asoy pang Cabildo.
Si Aragon sumala pang Cabildo nabutang sa ilang drug personality watchlist samtang si Criminal Investigation and Intelligence Branch chief, Pablo Labra mitug-an sa Banat News nga dugay na nila kining gipangita.