Consultant sa CH pa-imbestigahon sa pamaligya'g X-ray film

Gimanduan ni Mayor Tomas Osmeña si Dr. Nestor Alonzo consultant sa City Hall nga maoy modumala sa pagpahigayon og imbestigasyon nga may labot sa nabulgar nga kontrobersya nga pagpamaligya sa mga wala magamit nga X-ray film diha sa Cebu City Medical Center (CCMC).

Wala mahimuot ang mayor gumikan sa grabeng kalangay sa imbestigasyon sa maong kontrobersya nga hangtod karon wala gyud siya mahatagi og update sa kalambuan sa maong imbestigasyon.

Human gipatawag ni Osmeña si Alonzo kagahapon, gidawat sab dayon sa doktor ang pagdumala sa imbestigasyon sa maong kontrobersya.

Apan sa wala pa mosanong si Alonzo midemanda kini ngadto sa mayor nga mangayo og usa ka kawani sa City Hall nga maoy iyang tahasan pag-rekord sa imbentaryo nga iya unyang himuon pagsugod sa imbestigasyon.

Giaprobahan usab dayon sa mayor ang maong hangyo ug gihatagan pa og kahigayonan si Alonzo nga maoy makapili sa kawani nga gusto niyang himuon nga auditor sa rekord niini.

Nabulgar ang maong kontrobersya human misuwat sa Ombudsman ug nidemanda og imbestigasyon ang nagpailang "whistle blower" sa giingong pagpamaligya sa pipila ka mga kawani sa maong publikong tambalanan sa mga X-ray films, inay nga taguan unta kini diha sa maong hospital.

Si Konsehal Cristopher Alix una nang miangkon nga nakadawat siya sa susamang reklamo sayo ning tuiga apan iyang gihulagway nga normal nga gi-practice diha sa maong tambalanan ang pagpamaligya sa maong mga X-ray films, gani mimando na siya og imbestigasyon niini apan hangtod karon wala gyud makadawat og resulta.