Mananagat giluba og botelya sa konsehal

Usa ka mananagat gibunalan sa konsehal sa lungsod og basiyo sa ilimnong makahubog ug sa dihang nabuak na ang botelya sa nawong sa biktima, gikuha ang buak nga botelya ug gidunggab pa gyud sa makadaghang higayon sa kalawasan hinungdan sa pagkalandig niini sa tambalanan.

Nahitabo kini niadtong Sabado sa gabii sa Sitio Gawahon Poblacion 2, Malabuyoc, Cebu.

Ang biktima giila sa kapolisan nga si Roger Salazar, 28, minyo, usa ka mananagat ug residente sa maong lugar.

Samtang ang gitumbok nga mibunal og botelya sa nawong ug midunggab sa biktima mao si Charito Sabac, 45, minyo ug konsehal sa Malabuyoc ug nagpuyo ra usab sa maong lugar.

Base sa pasiunang imbestigasyon ni SPO1 Ariel Mascardo sa Malabuyoc Police Station, nasayran si Sabac nagmaneho sa iyang sakyanan uban sa laing duha paingon sa basketball court aron motambong og Christmas party, apan pag-abot sa nahisgutang lugar kalit lang gibabagan ang sakyanan ni Sabac sa nanag-inom ug pulos na mga hubog nga sila si Ramil Villaroel, Silverio Allera, Ian Toring, ug ginganlan nga Aldo lakip na ni Salazar nga pulos mga residente sa maong lugar.

Mipahunong ang konsehal sa iyang sakyanan ug nanaog deretso'g duol sa lima aron hangyuon nga magpadaplin sa kalsada, apan ang lima nangasuko hinuon nga miresulta sa mainiton nga panaglalis.

Si Salazar kinsa kalit lang miduol sa iyang kauban ug sa konsehal, inay nga motambag kini, mao na hinuon ang unang nanumbag sa konsehal.

Gani matud ni SPO1 Mascardo nga maayong pagkaigo sa walang mata sa konsehal ug nagisi ang kilay human maigo sa kinumo ni Salazar.

Human niadto, ang konsehal nakakuha og botelya sa bino ug maoy gibunal sa nawong ni Salazar ug dihang nabuak sa nawong ang botelya mao kini gigamit pagpanunggab.

Si Salazar nakaangkon og upat ka samad dinunggaban sa buko-buko, usa sa dughan, nawong ug walang bukton ug dali kini gidala sa MJ Cuenco Memorial Hospital aron patambalan.

Matud ni SPO1 Mascardo nga misuway pa unta og uwang ang igsuon ni Sabac nga si Carlos nga usa usab ka barangay kagawad, apan wala gyud kini mopatuo.