Kagawad sa Day-as mireklamo kay wa i-apil sa biyahe

Midangop sa konseho sa siyudad sa Sugbo ang nagbinugtong nga barangay kagawad sa Day-as aron ireklamo ang ilang barangay kapitan nga si Micheal Ocleasa ug unom ka mga kauban niining kagawad tungod sa pagpahigayon niini og ilegal nga kalihukan.

Si Kagawad Suzette Quijano, miduso sa iyang suwat reklamo ngadto sa konseho ug ngadto ni Mayor Tomas Osmeña aron kwestyonon ang gihulagway niya nga ilegal nga lakbay aral sa iyang mga kaubanan nga himuon karong tuiga.

Sa suwat nga giduso ni Quijano ngadto sa konseho, iyang gihulagway nga wala siya iapil sa maong kalihukan ingon man ang iyang anak nga si Rafonzel Quijano nga maoy SK-chairman sa barangay.

Matud ni Suzette, iya na lang nahibaw-an nga wala siya giapil sa maong lakbay aral paingon sa Camiguin tungod kay gihulipan siya sa usa sa mga day care worker sa ilang barangay ug samtang ang iyang anak nga SK-chairman gihulipan usab sa ilang midwife sa barangay.

Tungod niini, gitinguha ni Suzette nga ma-imbistigar ang maong kalihukan, kun legal ba ang gihimo sa ilang kapitan ug unom niya ka mga kaubang kagawad nga mikanselar sa iyang pangalan ug sa iyang anak nga makaapil sa maong kalihukan bisan walay pagtugot gikan kanila.

Ang maong reklamo kasamtangan karong giduso sa grievance committee sa konseho ug samtang wala pay resulta ang imbestigasyon gipangayo usab sa nga reklamante nga pugngan usab ang maong mga opisyal nga makabiyahe alang sa lakbay aral karon untang adlawa.