GMA wa madayon sa Leyte

Wala modayon si Presidente Gloria Macapagal Arroyo sa pagbisita sa Guinsaugon, Southern Leyte gumikan sa dili maayong panahon kagahapon sa maong lugar.

Si Arroyo, mao unta ang motugyan sa mga balay sa mga nahabiling buhi human sa landslide sa maong lugar usa na ka tuig ang nakalabay.

Hinuon iyang gipahibawo nga nadayun gihapon ang pagtugyan sa kabalayan bisan wala ang iyang presensiya.

Si Arroyo hapon pa untang moabot sa Sugbo alang sa pagbukas sa Microsoft Cebu sa Asia Town IT Park sa dakbayan sa Sugbo.

Gumikan sa ka sayong pag-abot ni Arroyo sa Sugbo, nihapit una kini sa Cebu International Convention Center aron pag-inspeksiyon sa pahigayunan sa 12th Asean Summit karong Enero 11 hangtud 14 sunod tuig.

Kauban ni Arroyo mao sila si Gob. Gwen Garcia, Tourism Sec. Joseph Ace Durano, Deputy Speaker Raul del Mar, Kong. Antonio Cuenco, Lapu-lapu City Mayor Arturo Radaza.

Alas 12 pasado nang naabot si Arroyo sa buhatan sa Microsoft Cebu, diin gipahibawo siya sa kadagkoan niini sa ilang serbisyo nga gitabang sa gobyerno sama sa paghatag og internet access sa mga pangpublikong tunghaan, mga magtutudlo, mga kawani sa gobyerno ug mga Overseas Filipino Workers.

Gani ang Department of Education sa Sugbo ang gihatagan kagahapon sa pasidungog sa Microsoft isip Most Innovative DepEd Division sa tibouk Kabisay-an.

Gipasalamatan ni Arroyo ang Microsoft gumikan kay nahatukma ang ilang pagbubo sa puhunan sa Sugbo sa iyang hayag nga panglantaw sa ekonomiya sa nasud sunod tuig.