Sunog sa Ormoc: 24 ka tawo patay sa sunog

Kawhaan ug upat ka tawo ang nangapaig human sa pag-ulbo sa sunog sa sulod sa usa ka department store sa dalan Real sa dakbayan sa Ormoc niadtong Lunes sa gabii samtang busy ang mga tawo sa pagpalit.

Sumala pa sa report sa kabomberuhan, 23 niini ang napalgang nagpatong-patong sulod sa usa ka kasilyas nga naglakip sa usa ka bata, duha ka mga puya nga uban sa ilang inahang migakos pa nila, usa ka mabdos, samtang ang ika-24 nakabsan sa iyang kinabuhi diha sa Ormoc Sugar Planters Association hospital kagahapon na sa buntag tungod sa grabeng pagkasunog sa kalawasan niini.

Ang nasunog mao ang Unitop General Merchandise nga gipanag-iya sa usa ka langyaw. Dunay giingong onse ka mga naangol sa maong hitabo ug siyam kanila ang grabe lakip na ang nakabsan kagahapon.

Sumala pang SFO2 Bernard Corpin, ang Fire Safety Enforcement Section officer sa Ormoc City Fire department sa pakighinabi sa DySS kagahapon nagsugod ang sunog 4:40 sa hapon.

Gikatahong nagsugod ang kalayo diha sa atubangang ganghaan diin gituohang mga pusil-pusil nga may balang "tracer bullet" nga mitugpa sa baligya'ng pabuto maoy sinugdanan sa pag-ulbo.

Matud pa ni Corpin migamit pa sila og atsa aron pugsanong ug maabli ang kandado sa fire exit nga gikandaduhan diha sa gawas hinungdan sa nangatanggong ang mga biktima nga gituuhang gilangkuban sa mga empleyado ug mga mamalitay.

Gideklarar nga nakontrolar ang sunog 7:30 na sa gabii, hingpit kining napawong pasado alas 10 na sa gabii. Ang mga malisod ng ilhon gumikan sa grabeng pagkasunog, hinungdan nga mopatabang ang mga awtoridad sa Ormoc ngadto sa National Bureau of Investigation kabahin niini.

Gituuhang kadtong mga nakalingkawas mipugos ra gyud og agi diha sa nagdilaab nga pultahan tungod kay sarado ang fire exit diha sa gawas.

Base sa report, 17 sa mga biktima ang nailhan na nga mao sila si Eleonor Empimo, Ann Mae Sanchez, Annaliza Orayle, Mica Orayle, Catherine Mistula, Shiela Teves, Norissa Inday, Jun Rey Inday, Luzviminda Bagiou ug Oscar Merino.

Ingon man sila si Helen Constantino, Severina Cartagena, Eddie Boy Obeña, Felipe Obeña, Brandy Batasan, Dante Pigay, Elvisa Dequinco,si Cartagena maoy giingong namatay diha sa OSPA.

Gimando na sa mayor sa maong dakbayan nga si Mayor Eric Codilla ang pagpaimbestigar sa maong insidente ug patubagon ang angayang manubag, nasuta usab nga di lisensyado ang maong tindahan nga makabaligya og pabuto.

Kagahapon atol sa panagtigum sa mayor ug mga opisyales sa dakbayan gitugutan sa mayor nga ipalubong na ang mga namatay kung molapas na ang usa ka adlaw nga walay moila kanila tungod usab sa posibleng sakit nga mahatag niini duol sa ilang gibutangan.

Diha sa punerarya sa V.Rama Funeral Homes nga gidad-an sa mga nangamatay, nagdasok na ang gatusan ka mga gituuhang mga kabanay sa mga namatay aron ilhon ang mga biktima.

Si Vincent Rama kansang kaliwat gikan dinhi sa Sugbo ug maoy nanag-iya sa maong punerarya nagkanayon sa DySS nga sagad sa mga nangamatay nahilo sa aso ug nangapaig.

Matud pa niya, kadtong unang naugkat nangapaig gyud ang kalawasan samtang kadtong mga naulahi namatay sa aso ug ang uban nasunog gyud.

Gisugdan na karon sa dakbayan sa Ormoc ug kabomberuhan ang imbestigasyon sa tulubagon sa tag-iya sa maong edipisyo ingon man ang pagpahiluna sa mga nangamatay ug ang pagpatambal sa mga nangaangol.