Duha ka batan-on gipusil atol sa rambol

Duha ka tawo ang nabun-og ug napusilan sa nahitabong rambol kagahapon sa kaadlawon diha sa Sityo Sangi, Barangay Tabunok dakbayan sa Talisay.

Si Virgilio Ohagan, 24-anyos, residente sa maong lugar nakaangkon og samad pinusilan sa iyang likod ug bun-og sa lawas ug ang kauban niining si Manolito Macalinao, 22, taga Barangay Manipis nakaangkon usab og bun-og sa lawas.

Laing biktima mao si Richard Cabardo, 24, taga Sitio Kimba, Barangay Cansojong kinsa nakaangkon usab og samad pinusilan sa walang tiil.

Ang tulo daling gidala diha sa Talisay District Hospital.

Ang mga suspetsado, upat ka wala mailhing lalaki nga nag-estambay diha sa usa ka payag sa lugar nga nahitaboan.

Si PO1 Achilles Alisen kinsa maoy miresponde sa hitabo mibutyag kagahapon sa buntag sa Banat News nga si Ohagan mipasangil nga si Cabardo kauban sa upat ka suspetsado.

Ug si Cabardo mipasangil usab ngadto ni Ohagan nga kauban usab sa mga lalaki nga mipusil ug mikulata kanila ni Macalinao.

Base sa imbestigasyon sa kapolisan sa siyudad nga si Ohagan uban ni Macalinao nga naglakaw diha sa lugar paingon na nga mopauli.

Ang duha gipangutana sa nahisgutang upat ka lalaki kung asa sila paingon.

Apan sa walay igong rason gisukmag si Ohagan ug Macalinao sa maong mga lalaki hinungdan nga nahitabo ang karambola.

Kalit nga dunay mibutong pusil og nabantayan na lang ni Ohagan nga napusilan siya sa usa sa mga suspetsado.

Atol sa maong insidente si Cabardo nagsakay sa iyang traysikad kinsa gikan namisita sa iyang uyab.

Nataboan ni Cabardo ang tulo ka wala mailhing lalaki og kalit lang usab siyang gipusil niini.

Ang kapolisan mipahigayon og follow-up nga imbestigasyon sa motibo sa maong insidente.