Bag-ong Waterfront police station iturn-over karong Dec. 29

Ipahigayon na karong Disyembre 29 ang pag turn-over sa Cebu Chamber of Commerce and Industry ug kagamhanan sa dakbayan sa Sugbo sa bag-ong Waterfront Police Station 3.

Ang Waterfront Police Station 3 building gidonar kini sa VICSAL Foundation Inc. (Metro Gaisano) nga gipanag-iya sa banay'ng Gaisano nga girepresentahan ni Jack Gaisano kinsa maoy presidente ug Chairman.

Ang building nahimutang sa Legazpi extension, Fort San Pedro, barangay San Roque, dakbayan sa Sugbo, nga nakompleto niadto pang buwan sa Oktobre.

Kini ang ikaduhang police station sa dakbayan sa Sugbo nga gisagop sa CCCI diin ang una mao ang Mabolo Police Station nga gidonar usab sa Aboitiz Group.

Matud pa ni Francis Monera, presidente sa CCCI, nga importante kaayo sa negosyo ang pagpatunhay sa kalinaw ug kahusay hinungdan nga ilang tabangan ang kapolisan.

Dugang police station ang gipaabot nga sagupon usab sa CCCI sunod tuig sumala pa ni Monera.