Trak natikwang 8 ka tawo 'angol

Laing aksidente na usab sa kadalanan ang nahitabo sa habagatang bahin sa lalawigan sa Sugbo diin walo ka tawo ang nangaangol human ang trak de karga nga ilang giluwanan nga napuno sa gikarga nga mga lipak sa kawayan ang kalit lang nga natikwang sa Taluot, Argao sa miaging hapon.

Si P02 Reynaldo Rubia nga gihinabi sa Banat News miila sa mga biktima nga mao sila si Juanito Algones, Jaime Alagones, Diosdada Baron, Maria Calvo, Policarpia Batoctoy, Antonio Habagat ug Hesen Rosario.

Dugang pa niya nga gimaneho ni Resalio Modelo, 23 anyos, ulitawo nga taga Maayaay, Obaub, Argao ang maong de karga nga sakyanan nga giluwanan sa mga biktima.

Si PO2 Rubia miingon nga sa mga biktima nga naangol ang duha nga sila si Juanito Algones ug Jaime Alagones maoy nagrabehan ug padayon kining giatiman sa mga doktor sa tambalanan sa dakbayan sa Sugbo.

Dugang pa niya nga gikan sa Mantalongon ang maong sakyanan nga giluwanan sa mga biktima dihang paghidangat sa national road sa Taluot, Argao kalit lang kining natikwang.

Niadtong milabay'ng Biyernes sa buntag, namatay sa usa ka kawani sa korte sa Naga samtang naangol usab ang pito ka mga manindahay og utanon sa Carbon human magbangga ang ilang trak de kargang gisakyan og multicab sa namatay.

Sa pasiunang imbestigasyon sa kapolisan sa Naga natino nga wala makakontrol ang drayber sa trak nga si Virgilio Nepumuceno dihang nangahagbong ang ilang kargamento sa dalan samtang nagdagan diha sa barangay Colon ug adto misampak sa multicab ni Teodosio Rizon Jr.

Patay nga naabot sa tambalanan si Rizon samtang ang pito ka naangol gikan sa ibabaw sa trak ni Nepumuceno nangatagak.