Mga terminal higpit bantayan

Higpit karon nga gibantayan sa kapolisan ang mga terminal sa mga sakyanan, pantalan ug tugpahanan sa nasud alang sa paghatag og kasiguroan sa mga sumasakay nga magtapok alang sa pagpamauli sa ilang mga lalawigan.

Si PNP Chief Direktor General Oscar Calderon sa giluwatan niining kamandoan ngadto sa mga director ug mga hepe sa kapolisan sa nasud mimando ang higpit nga pagbantay sa mga pantalan, mga tugpahanan sa mga abyon, mga terminal sa sakyanan ug uban pa.

Dinhi sa Sugbo, si PNP Chief Superintendent Silverio Alarcio ang mimando ngadto sa mga direktor ug mga hepe sa kapolisan sa higpit nga pagpatuman sa kahapsay ug kalinaw.

Naglakip sa higpit nga gibantayan mao ang North Bus Terminal ug South Bus terminal port area sa Sugbo ug Mactan Cebu International Airport (MCIA) sa Mactan, Lapulapu.

Si Mandaue City Police Director Alexander Abadinas ug si Cebu City Police Director Melvin Gayutin ang mimando usab sa mga hepe niini sa iyang presinto sa kapolisan sa pagpatuman sa kahapsay ug kalinaw.

Sa nasayran sa Banat News kang Abadinas nga lakip sa gibantayan sa kapolisan sa dakbayan mao ang mga oil depot, Mactan Mandaue Bridge ug Marcelo Fernand Bridge.

Dugang pa niya nga lakip usab sa ilang gibantayan ang mga simbahan nga magsugwak ang mga tawo sa matag kaadlawon sa pagsimba sa Misa de Gallo.

Kini usab ang gihimo ni Sr. Supt. Vicente Loot, Cebu Provincial Director sa kapolisan sa Sugbo pinaagi sa pagpaalerto usab sa mga hepe niini sa kalungsoran.