Yapha nawad-an na'g paglaum madayon ang Sugbuak

Nakabsan og paglaum si Kongresista Antonio Yapha bahin sa mga Sugbuak Bills nga maaprobahan sa pagkahimong balaod gumikan sa kaapiki na sa panahon.

Matud pa ni Yapha nga taas pang proseso ang latasanon sa tulo ka mga Sugbuak Bills, apan tungod sa nagkaduol nga election, wala na kini panahon nga matuki pa sa Senado ug sa Malacañang.

Nahugno sa kasubo si Yapha dihang napakyas ang maong mga balaodnon sa pagbasa sa House Committee on Rules niadtong Miyerkules gumikan sa pagbabag nila ni Kongresista Antonio Cuenco.

Nasayran ni Yapha ang pamahayag ni Cuenco nga matud pa mao ra siyag irong Dobberman kauban sa ubang mga magbabalaod nga Sugbuanon sa pagbantay nga dili gyud ikasukip ug makalendaryo sa Committee on Rules aron matakda alang sa deliberasyon ang maong mga Sugbuak Bills mao ang mga balaodnon nga gisang-at ni Yapha aron himoong Occidental Cebu ang ikatulong distrito, Cebu del Sur ang ikaduhang distrito ni Kongresista Simeon Kintanar, ug ang kang Kongresista Clavel Asas-Martinez mao ang paghimong Cebu del Norte sa ika-upat nga distrito.

Si Yapha gibatig kapikal, ug busa pagsaway niya ang gibuhat ni Cuenco ug alang kang Yapha nga maayo unta kon gipasagdan lang nila ni Cuenco nga madiskorte sa Committee on Rules ang maong mga balaodnon ug didto unta siya magdobberman sa pagsupak-supak niini.

Giisip ni Yapha nga usa ka tinalawan ang gihimo ni Cuenco ug uban pang mga Kongresista sa Cebu kay nahadlok sila nga kon katawhan na maoy mopakanaog wa ilang desisyon bahin sa maong mga balaodnon pinaagi sa plibisito, sigurado gyud nga makalusot kini kay pabor man ang katawhan nga modaghan ang mga probinsya sa Cebu.