Naga di mawad-an sa paglaom nga ma-siyudad

Bisag giisip nang patay ang balaodnong nagduso sa Naga nga mahimong siyudad, apan alang kang Mayor Valdemar Chiong, mabanhaw kini sa higayong makapasar na ang iyang lungsod sa mga "requirements".

Giangkon ni Chiong nga sa pagkakaron dili pa makapasar ang Naga sa gipangayong tinuig nga kinitaan nga P100 milyones ug 100,000 nga populasyon, apan pasado na kini sa gidak-on sa yuta. Hinuon matud pa ni Chiong nga sa pagkakaron mokabat na ang ilang tinuig nga budget og P114 milyones, apan tungod kay ang requirement, dili man ipalakip ang Internal Revenue Allotment IRA nga P60 milyones, maglisod gyud sila pag-abot sa limpyong P100 milyones.

Apan pipila ka tuig gikan karon, dakog paglaom si Chiong nga basta dili lang pun-an kinign requirement bahin sa kinitaan og populasyon, siguradong makapasar na ang Naga.

Kini tungod kay nag-anam ka daghan karon ang mga industriyang gipanukod sa Naga nga ang labing bag-o mao ang "dressing plant" sa manok nga mikantidad og P50 milyones. Naa pay tukoronong "power plant" sa Korea.

Ang kasamtangang industriya nga nagtunol og dagkong buhis nga maoy kinitaan sa Naga, mao ang Apo Cement, Salcon Power Corporation, Cantaw-an Economic Zone, Pryce Gas, ug uban pa.

Bahin sa koleksyon sa buhis ang lungsod sa Naga maoy labing dako og makoliktang buhis matag tuig itandi sa ubang mga lungsod sa lalawigan sumala ni Chiong.

Bahin sa "employment", naghatag ang Naga ug kasayon sa pangimpliyo sa iyang mga molupyo tungod sa kadaghang industriya nga gipanarok sa maong lugar, matud pa ni Chiong.