Pundo sa komitiba sa edukasyon buot pun-an

Komitiba sa edukasyon sa dakbayan sa Talisay naglaom nga mapun-an sa siyudad ang ilang budget sa sunod tuig.

Si Konsehal Richel Bacaltos tsirman sa komitiba sa edukasyon mibutyag kagahapon sa Banat News nga kuwang ang P11,700.00 milyones nga gigahin sa siyudad sulod sa usa ka tuig para sa edukasyon.

Apan gilaoman nga mapun-an kini sa sunod tuig tungod kay pasakaan sa siyudad ang kolekta sa real property tax.

Sa real property tax kuhaon ang Special Education Fund (SEF).

Ang maong budget gigamit sa pagpaayo sa mga guba nga classroom, pagpamalit og mga ekipo sa mga tunghaan ug sweldohan sa mga Teachers Aid Volunteer (TAV) niining tuiga.

Ang siyudad adunay 120 ka TAV diin 65 niini sa elementarya ug 55 sa high school og matag usa kanila magdawat og P6 mil nga sweldo kada buwan.

Gibutyag ni Bacaltos nga ang TAV maoy adunay dakong gahin sa budget matag tuig og ang sobra sa pundo maoy igasto para sa pag-ayo sa mga guba nga classroom ug uban pang ekipo nga kinahanglanon.

Ang konsehal nagkanayon nga kasagaran mangita na lang sila og sponsor para maoy modonar og mga classroom diin usa na niini si Kongresista Eduardo Gullas.

Ang Talisay National High School, Lawaan National High School, Candulawan National High School ug Manipis National High School kuwangan og mga classroom tungod kay matag tuig nagkadaghan ang mga estudyante.

Tungod sa ka kuwang sa class room ang ubang mga magtutudlo anha na lang magklase sa school ground og magtabil-tabil kini og mga sako para dili mainitan ug mauwanan ang mga estudayante.

Si Bacaltos midungag nga gawas sa kakuwang og class room kuwangan usab og mga laboratory equipment ug mga instructional material ang mga pampublikong tunghaan sa siyudad.