Hired killers gukoron

Gimando sa kadagkuan sa Philippine National Police ang pagdakop sa tanang mga tawong gidudahang mga hired-killers, aron usab mamenusan ang mga kaso sa pagpatay, may kalambigitan sa umaabot nga piniliay karong sunod tuig.

Si PNP spokesman Chief Supt.Samuel Pagdilao Jr. nagkanayon nga buot ni PNP director, Oscar Calderon pangusgan ang operasyon aron ilhon ang mga hired-killers sa nasud.

Ang kamandoan mihatag og tagal sa tanang intelligence units sa nasud sa pagkuha sa mga listahan sa mga tawong ilang gidudahang mga gun-for-hire una pa magsugod ang kampanya alang sa umaabot nga piniliay.

Ang election period gimandong magsugod karong Enero hangtud nga matapos ang eskutenyo sa bulan na sa Hunyo.

"One of the PNP's desire is to flush out gun-for-hires,the PNP chief ordered regional directors and intelligence groups to become more dedicated in going after hired killers," asoy pang Pagdilao sa usa ka interbyu sa usa ka sibyaanan sa kaulohan.

Dugang pa sa maong kamandoan mao ang pagpangusog sa pagpanakop og pagsakmit sa mga di lisenyadong mga armas dinhi sa nasud nga maoy sagad nga gamiton sa mga krimen.

Giawhag sad sa direktor sa PNP nga susamang dedikasyon ang angayng buhaton sa intelligence operatives sa pagdakop sa mga lider sa mga rebelde, mga kidnap-for-ransom groups ug mga sindikato sa pagdakop usab sa mga hired-killers.

Ning bag-uhay lang mahulagway nga misiaw pag-ayo ang mga gun-for-hire dinhi sa nasud diin mga politiko maoy ilang mga target samtang nagkaduol ang piniliay.

Gidudahan sa kapolisan nga samtang nagkaduol ang eleksyon modaghan usab ang kalihukan sa mga gun-for-hire diin ang trabaho mao ang pagtipi sa mga politiko bugti sa bayad gikan sa mga higpit nilang karibal.

Dinhi sa Sugbo, si Police Regional Office 7 Silverio Alarcio,Jr. mitug-an kagahapon sa mga tigbalita nga wala pay mga magbabalaod ang miduol sa ilang buhatan aron sa pagpangayo og bodyguard tungod sa mga hulga.

Matud pang Alarcio nga base sa rekord atol sa piniliay ang Sugbo dili susama sa mga lalawigan sa Ilocos, Mindanao ug ubang parte sa Luzon kasamok.

Si Alarcio nagkanayon nga subling gibuhi sa kapolisan ang Task Force Hope (honest, orderly,peaceful elections), dinhi sa Sugbo nagsugod na og tigum ang maong grupo aron subayon ang mga miaging panghitabo matag eleksyon dinhi sa Sugbo ug ingon man ang posible pang mahitabo aron makapangandam ang lokal nga kapolisan.

Subay sa nadawat nga impormasyon sa intelligence units sa kapolisan, si Pagdilao nagkanayon nga P10 mil ngadto sa P20 mil ang "dawat" sa mga gun-for-hire matag usa ka target, mas lisud nga trabaho mas dako ang bayad.