Tinai sa babaye nahabwa kay giluba

Nahabwa ang tinai sa ka 50-anyos nga babaye kinsa biktima sa pagpanunggab sa igsuon sa kapuyo niining lalaki atol sa ilang panaglalis sa miaging gabii sa New Paradise Island, Pajo, Lapu-Lapu nga maoy hinungdan sa kamatayon niini.

Ang biktima mao si Aurilla Landisa ug ang nagdunggab mao si Remegio Ritchie Daitol Barbon, 55, minyo ug pulos lumolupyo sa maong dapit.

Si PO1 Herman Belila sa Homicide Section nga gikahinabi sa Banat News miingon nga didto sa panimalay sa biktima ang suspetsado ug nagpahibalo nga sa panimalay niini papuy-on ang nagmasakiton nilang inahan aron mao na usab kini ang moatiman.

Matud pa ni PO1 Belila nga nasuko ang biktima ug misangko sa mainiton nga panaglalis hangtod nga ang suspetsado kinsa wala makapugong sa kasuko kalit lang mikuha og kutsilyo ug gidunggab ang tiyan sa biktima.

Dugang pa niya PO1 Belila nga dali untang gidala ang biktima sa mga sakop sa Emergency Rescue Unit Foundation Inc. sa Sugbo sa Vicente Sotto Memorial Medical Center sa dakbayan apan gideklarar kini sa mga doktor nga patay na nga nahidangat kanila.

Dugang pa ni PO1 Belila nga ang suspetsado nga ilang nadakpan sa ilang pagtubag sa maong alarma gitanggong na karon sa sulod sa bilanggoan.