Psychological test sa mga magtutudlo gidayeg sa DepEd

Ang mga magbabalaod nga Sugbuanon gidayeg ni Sec. Jesli Lapus sa Department of Education (DepEd) kay misuporta kini sa iyang lakang pagpatuman sa "psychological test" sa mga aplikante pagka magtutudlo sa eskuylahan sa gobyerno.

Matud pa ni Lapus nga dihang nadawat niya ang resolusyon sa Sangguniang Panlalawigan sa Cebu bahin sa pagpaluyo niini sa iyang mando pagpatuman sa psychological test, labi siyang miisog sa pagpatuman sa maong lakang.

Ang mando ni Lapus nagpatuman sa psychological test, nahimutang sa iyang DepEd Order NO. 17 series of 2006 nga giluwatan sayo ning tuiga nga nagbuot nga kutob sa moaplay pagkamagtutudlo sa elementarya ug sekondaryang tulunghaan sa kagamhanan, kinahanglan mopasar una sa test.

Pinaagi sa maong eksaminasyon, makasiguro na ang DepEd nga ang mga madawat nga magtutudlo niini ug uban pang posisyon sa department, pulos na maayo og mentalidad ug emosyon.

Namugna ni Lapus ang maong mando human madawat ang daghang pangabuso sa mga magtutudlo sa nagkalainlaing lugar sa nasud nga naglakip sa pagpanglugos sa mga maestro sa iyang tinun-ang babaye.

May mga maestra usab nga mikulata sa ilang mga batang estudyante ug may maestra pang mipakaon og tinalhan sa lapis sa iyang estudyante nga maoy hinungdan sa kamatayon niini.

Sa mao usab nga mga hitabo, dihang nasayran sa mga magbabalaod sa lalawigan sa Sugbo ang lakang ni Lapus, si Board member Juan Bolo, tsirman sa committee on education, maoy nangamahan dayon sa usa ka resolusyon nga magpadayag og suporta sa mando ni Lapus ug giluwatan kini human pirmahe sa tanang sakop sa hunta probinsyal niadtong Septiyembre 25, 2006.