2 ka puso sa Biasong kagawon

Duha ka puso sa Barangay Biasong, Talisay nagpabilin pa gihapon nga positibo sa kagaw.

Si Talisay City Health Officer Lino Alanzado nagkanayon kagahapon sa Banat News nga ang nahisgutang mga puso iya na kining gipa-undertreatment sa milabay'ng duha ka buwan og niadtong petsa 6 niining buwana gipausab niya kini og pasusi pagpiho kun wala na ba kini kagaw.

Apan base sa nakuhang resulta kagahapon sa buntag duha sa maong puso nagpabilin pa gihapon nga dunay kagaw.

Matud ni Alazando nga ipaubos niya sa pag-usab ang nahisgutang duha ka puso nga positibo sa kagaw.

Sa laing bahin, ang city health officer mibutyag nga adunay establisamento sa siyudad ang wala mokuha og permit para sa water refilling station niini nga gitukod.

Ang Talisay Ice Plant diha sa Lawaan I wala pa makakuha og permit sa siyudad aron masusi kun luwas ba nga imnon ang tubig nga ilang ibaligya ngadto sa konsumedor.

Si Alanzado midungag nga ang Department of Health (DOH) miduaw sa water refilling station sa Talisay Ice Plant hinungdan nga nahibaw-an kini nga walay permit.