Ang bata nga giingong naghikog giilang si Neil Brian Gonhuran,14, residente sa dalan F.Gochan sa Mabolo, ning dakbayan .
Sumala pa sa imbestigasyon ni SPO3 Alex Dacua sa Homicide Section nakit-an na lang sa iyaan sa biktima si Gonhuran nga nagluhod nga nagbitay sulod sa ilang balay niadtong milabay'ng hapon.
Ang biktima migamit og pisi nga gihikot niini sa iyang liog ngadto sad sa kahoy sa ibabaw sa ilang balay.
Matud pa nga sukad nga namatay ang apuhan ni Gonhuran niadtong milabay'ng Oktubre ning tuiga kanunay na nilang makit-an magul-anon ang bata, ug kini maoy hinungdan sa pagtuo nilang maoy nagtukmod kaniya sa paghikog.
Walay nakit-ang kaguliyang sulod sa lawak diin makit-i ang biktima ug wala usab laing mga bun-og ug samad diha sa iyang lawas nga magtumbok nga dunay foul-play ang kamatayon niini.
Samtang sa laing bahin, usa ka wala mailhing lalaki nga gibana-banang nagpangidaron og 30 anyos ang nakit-ang naglutaw-lutaw diha sa sa kadagatan duol sa Shell Island sa barangay Ermita ning dakbayan.
Ang maong tawo kasarangan ang lawas,taas ang buhok, kayumangi ang pamanit, may gitas-ong 5'4 ug nagsuot kini og shortpants ug t-shirt.
Dunay nakit-an ang mga polis nga patik nga kasing-kasing diha sa iyang tuong bukton ug usa ka espadang may mga rosas nga may pangalang "Genelyn" diha sa wala usab niining bukton.
Ang maong tawo nagsugod na og kadunot ug gisugdan na og kaon sa mga gagmayng isda.
Usa ka grupo sa salvaging boat nga SV77 diha sa maong dapit nga gipangulohan ni Michael Villar maoy nakakita sa maong tawo hinungdan nga ila kini dayong gipahibalo sa Philippine Coast Guard.
Si Chief Petty Officer Renato Capuyon ug maoy officer-in-charge sa Coast Guard Station-Cebu mao nay midala sa patayng lawas sa biktima diha sa Pier Uno ug gidala kini sa punerarya sa Saint Francis.
Mohigayon pa og awtopsiya ang kapolisan aron pagtumbok sa hinungdan sa kamatayon sa biktima ingon man ang posibleng pag-ila kaniya.