Polis nangilkil 'sikop

Kontrobersyal nga polis nga kaniadto dinhi sa Sugbo nadestino apan gibalhin na ngadto sa Bohol gipasanginlang nangilkil ug nanukmag sa usa ka 17-anyos nga lalaking magbalantay sa usa ka peryahan diha sa barangay Guadalupe niadtong Sabado sa gabii.

Wala hinuon makapalag si PO1 Wenceslao Dino,33, kinsa residente diha sa sitio Gameo sa luyong bahin sa simbahan sa Guadalupe Parish apan nadestino sa lungsod sa Lila sa Bohol sa dihang gisikop sa mga kaubang polis.

Sumala pang PO3 Teodoro Lumanes, ang desk officer sa Guadalupe police station nga usa ka Mylene Yongod ang agalon sa 17 anyos nga biktima kinsa maoy nagbantay sa peryahan.

Giingong hubog niadtong tungora si Wenceslao ug miduol diha sa gibantayang kalingawan sa batan-on dayong pangayo og kwarta apan dihang mibalibad ang batan-on kalit kining gisukmag sa maong polis.

Ang biktima mireklamong diha gisukmag sa dughan hinungdan nga misumbong kini kang Yongod kinsa dali usab nga mitawag og polis sa Guadalupe.

Ang grupo ni SPO2 Lito Lirazan mao nay midakop kang Wenceslao ug gidala kini sa ilang buhatan.

Si Wenceslao dihang gihinabi sa mga tigbalita mihimakak sa pasangil nga iyang gisukmag ang batan-on kay matud pa niya igo lang siyang mitukmod sa dughan niini.

Nasutang positibo sa gihimong liquor test si Wenceslao ug gikatakdang pasakaan og kasong paglapas sa City Ordinance 1929 (paghubog-hubog), public scandal ug physical injuries.

Si Sr.Supt. Patroseño Comendador, ang deputy chief sa Regional Investigation and Intelligence Division sa PRO7 mitug-an sa Banat News nga ila ng gitutokan ang kaso ni Wenceslao tungod sa kadaghan na og reklamo batok kaniya.

Matud pang Comendador nga nasuspenso na kaniadto ang maong polis ug giimbestigahan na kini tungod sa nahimong sala diha sa Regional Training Center kaniadto ug ang Regional Mobile Group maoy milihok sa kaso. Dugang pa ni Comendador nag-awol na kini kaniadto apan wala siya makasiguro kung asa siya nadestino niadtong tungora.

Matud pang Comendador nga mahimong mosang-at og reklamo ang reklamante diha sa People's Law Enforcement Board (PLEB) o ba kaha sa Regional Internal Affairs Service sa kapolisan aron mapahamtangan og linaing kasong administratiba si Wenceslao.