Responsible parenting movement gilusad

Pormal nga gilusad kagahapon sa Sugbo ang Responsible Parenting Movement dungan sa usa ka orientation mahitungod sa Natural Family Planning Program.

Kini isip tubag sa kamanduan ni Presidente Gloria Macapagal Arroyo ngadto sa Department of Health ug Commission on Population sa pagpatuman og agresibo ingon man sistemado nga paagi sa pag-promote sa responsabling pagplano sa pamilya.

Dunay ipahigayun nga klase matag barangay lukop nasud sulod sa walo ka oras alang sa mga magtiayun aron mapasabot sa maayong pag-atiman sa pamilya.

Gipasabot ni PopCom-7 Director Leo Rama nga matag barangay dunay hulmahon nga Barangay Responsible Parenting Movement Group nga langkuban sa barangay health workers, mga volunteers, NFP teachers-users, lider sa simbahan ug people's organization.

Ang klase sugdan sa tag napulo ka magtiayun matag barangay.

Matud pa ni Rama nga hangtud sa tuig 2010, tinguha sa kagamhanan ang 4.2-milyones ka magtiayun sa 42,000 ka barangay lukop nasud ang matudloan sa hustong paggamit sa NFP.

Ang itudlo maglangkub sa Responsible Parenting, Fertility Awareness ug Natural Family Planning Methods.

Dugang pa ni Rama nga gituyo ang maong programa aron mauyunan ang gusto sa simbahan sa pagpagamit sa NFP ug dili lang ang artificial family planning method.