Hugaw sa tawo, patay'ng hayop maoy gidudahang nakaingon sa pagkahugaw sa tubig sa Sogod

Giangkon sa mga opisyal sa Sogod Waterworks System sa lungsod sa Sogod, Cebu nga nasagolan gyu'd og hugaw sa tawo, ug patay'ng mga hayop ang tubig nga imnonon sa taga Sogod niadtong buwan sa Septiyembre 2006.

Kini tungod kay matud pa ni Lito Noya, Manager sa SWS nga mga dagkong sapa sa ibabaw nga bukid sa mga bungtod sa barangay Bagatayan, Sogod mibuhagay ang tinubdan sa tubig nga maoy gikuhaa'g suplay sa SWS.

Ang SWS usa ka proyekto sa tubig nga gipadagan sa kagamhanan sa lungsod sa Sogod ug nagsugod kini sa iyang kalihokan pagsuplay og tubig sa kapin sa 1,000 ka mga panimalay sa lungsod niadtong 2005.

Matud pa ni Noya nga dako silag pagtuo nga ang tubod sa tubig nga anaa sa tiilan sa mga bungtod sa Bagayayan, may koneksyon sa mga dagkong sapa sa bukid ibabaw sa Sogod.

Sa maong mga sapa malagmit didto manukad ang mga hugaw sa tawo ug patay nga mga hayop nga nakamugnag "coliform" sa tubig nga gisuplay sa SWS ngadto sa mga molupyo sa Sogod.

Ang maong katahap sa taga SWS, nakompirmar nila tungod kay matag bundak sa uwan, malubog usab ang ilang tubig, busa may kamatuoran sila nga may koneksyon kini sa mga dagkong sapa sa bukid nga mobaha panahon sa kusog nga uwan.

Hinoon nasulbad dayon kining maong problema karong nakapalit na silag "chlorinator machine," matud pa ni Noya.

Pinaagi sa pagbantay nila pag-ayo matag oras sa tubig nga mapundo sa ilang "reservoir" gisambogan kini og .02 ngadto sa .5 millimeter matag litro sa tubig nga mapundo sa ilang reservior, hinungdan nga bisan usa ka tawo, wa apiktahe sa coliform nga nadiskobrehan niadtong Septiyembre.

Matud pa ni Noya nga Disyembre na karon, ug wala sila makadawat og taho nga may gisakitag tiyan, o kaha nagkalibanga o gi-cholera gumikan sa hugaw nga tubig sa SWS tungod kay limpyo na kaayo karon ang ilang tubig basi sa pamatuod ni Sogod Municipal Health Officer Esperanza Roble.