PRO-7 alerto vs NPA

Mipagawas og pahinumdom ang operations and plans division sa Police Regional Office 7 ngadto sa ilang mga sakop sa pagpabantay sa ilang seguridad tungod sa gipakitang agresibong hulga sa mga rebeldeng New People's Army.

Si Sr. Supt. Carmelo Valmoria, hepe sa maong buhatan mipadangat sa maong pahinumdom sa tanang mga ginsakupan human sa pagpatay sa usa ka kongresista ug bodyguard niini didto sa kauluhan niadtong milabay'ng adlaw.

Matud pa sa maong memorandum nga dunay deklarasyon ang lider sa Communist Party of the Philippines-NPA partikular na si Gregorio "Ka Roger" Rosal sa ilang pahibalong ilusad ang opensiba sa tanang mga sakop sa militar, kapolisan ug mga paramilitary units niini.

"Advice your personnel to be extra vigilant to avoid being victimized by Sparrow Units of the "communist-terrorist," sumala pa sa maong memorandum.

Niadtong milabay'ng Sabado sa hapon, gitumba si Abra Representative Luis Bersamin Jr. ug ang iyang bodyguard nga si SPO1 Adolfo Ortega nga sakop sa Police Security Protection Office wala pa hinuoy miangkong grupo nga responsable sa pagpamusil..

Nunot niini si acting Cebu City Police Office director mipadangat usab sa maong pahinumdom sa iyang mga sakop aron kalikayang dunay birahang mga polis dinhi sa dakbayan.

Daan nang dunay hugon-hugon pipila na ka bulan ang milabay kabahin sa presensya sa mga Sparrow units dinhi sa Sugbo apan wala gyud kini gikumpirmar sa kapolisan.

Gimando usab sa PRO7 ang pagbantay sa mga lokal nga mga opisyales sa gobiyerno, mga vital installations sa rehiyon lakip na ang mga planta sa kuryente, tubig, mga kampo sa kapolisan ug mga kabtangan sa gobiyerno.

Lakip sa gimando mao ang pagpangusog sa intelligence monitoring aron mabantayan ang presensya sa maong mga rebelde.