Comelec manglista kutob sa Dec. 31

Gipahibalo sa Commission on Election (Comelec) nga kutob na lang karong Disyembre 31 ang pagpangrehistro sa mga bag-ong botante ug pag-file og transfer niini.

Si Comelec Chairman Benjamin Abalos miingon nga ang batan-on nga 18 anyos ang panuigon gikinahanglan gayod nga magparehistro aron makaapil og botar sa Mayo 14 nga lokal nga eleksiyon.

Matud pa niya nga sa Enero 15 karong sunod tuig ang mga nagtinguha sa pagkandidato sa maong piniliay makahimo na usab sa pag-file sa ilang kandidatura.

Si Mayor Thadeo Ouano sa Mandaue motapos na sa iyang ikatulong termino karong sunod tuig ug mipahibalo nga ang iyang anak nga si "Jovito Jonkie Ouano" maoy mokandidato pagka mayor isip hulip kaniya.

Gibutyag na usab niya ang mga kandidato nga sakop sa konseho gawas lamang sa bise mayor nga team ni Jonkie Ouano nga gikabalak-ang maoy magkaatbang si Konsehal Glenn Bercede ug Konsehal Jonas Cortes.

Ang lokal nga eleksiyon karong Mayo 14 sa sunod tuig pagalangkoban kini sa mga kandidato alang sa pagka konsehal sa lungsod o siyudad, mayor ug bise mayor, board member, gobernador ug bise gobernador, kongresista ug 12 ka mga senador.

Si Provincial Election Officer Edwin Cadungog miingon nga bisan kun dugay na sila nga nangandam alang sa gikatakdang lokal nga eleksiyon karong Mayo 14 apan iyang namatikdan nga hinay kaayo ang kisaw sa mga kandidato nga mohimo sa ilang pagpangandam.

Matud pa niya nga pipila pa lamang ka mga pundok politikanhon ang nagporma na sa ilang kandidatura nga ilang namatikdan sa kalungsoran sa lalawigan sa Sugbo.