Malinawong rally maoy awhag-Dakay

Mga kadagkoan sa Arsdiyoseses sa Sugbo nag-awhag alang sa malinawon nga rally karong adlawa sa mga militanteng grupo ug tigpasiugda sa maong kalihokan.

Kini maoy gitug-an ni Msgr. Achilles Dakay ang media liason officer sa Arsdiyoses sa Sugbo sa dihang nahinabi sa mga tigbalita.

Matud pa ni Dakay nga ang simbahan kanunay man gayud naghandom sa kalinaw sa matag dunay rally nga mahitabo. Nanghinaut ang mga kadagkuan ubos sa talahurong Cardinal Vidal nga unta mapatuman ang kahapsay ug kalinaw niining adlawa batok sa mga raliyesta ug mga kapolisan.

Didto sa kauluhan mismo si CBCP President Arsobispo Angel Lagdameo mao'y nag-awhag ug nangunay sa pag-una sa rally sa Quirino Grandstand karong adlawa kinuyugan sa mga lain-laing sektor sa simbahan ug mga militanteng grupo nga supak sa Charter change.



Samtang sa ilang bahin dinhi sa Sugbo sila nag-awhag sa ilang mga kaparian nga dili mag-apil sa rally ug hinuon sa pagpasabot sa mga katawhan unsa kining charter change ug unsa niini ang mga advantages ug disadvantages atol unya sa ilang tanang misa karong adlawa.

Kini mao'y gihatag nga pahimangno dili pa lamang dugay ni Cardinal Vidal sa tanang mga kaparian bisan pa man nga mga kadagkoan sa CBCP didto sa Manila maoy nangunay pagpasiugda sa rally.

Tungod niining desisyon sa Cardinal malikayan unya ang mga pagduda sa mga katawhan nga siya nag-apil apil sa politika ug nga di mabiyaan sa mga kaparian ang ilang parokya labina karong adlawa kasagaran nga pari dunay mga misa sa matag parokya ug kapilya.