Kawani sa gobiyerno dili padawaton og pinaskuhan

Gidid-an ang mga kawani sa gobiyerno ning panahon sa pasko nga modawat ug nangolekta og pinaskohan.

Gikonpirmar kini sa mga opisyal sa Civil Service Commission CSC dinhi sa Central Visayas basi sa gimbut-an sa Section 3 sa Republic Act 3019 o ang gitawag nga Anti craft and Corrupt Practices Act.

Gitumbok usab ni Ombudsman Merceditas Gutierrez ang Republic act 6713 o ang Code of Conduct and Ethical Standards on Public Official and Employees nga nagbuot nga kutob niadtong molapas niini nag-atubang sa kasong kriminal ug administratiba gumikan sa pangilkil ug pagdawat og suborno.

Busa dili kalikay sa bug-at nga silot ang mga opisyal ug kawani sa gobyerno kinsa modawat og pinaskohan bisan unsang matanga sa gasa, matud ni Gutierrez.

Ang nakapait niini kay kun isipon sa usa ka opisyal o kawani sa gobyerno nga gamay ra ang gasa nga iyang gidawat, unya may makareport niini ngadto sa buhatan sa CSC o kaha sa buhatan sa Ombudsman, siguradong dili makaikyas nga sa imbestigasyon ang hingtungdan.

Hinoon miingon si Gutierrez nga kon ang maong gasa gikan lang sa miyembro sa pamilya sa opisyal o kawani sa gobyerno, mahimong mopasaylo kini, basi sa balaod.

Ning panahon sa pasko, dili kalikayan nga may mga madawat gyud nga pinaskohan ilabi na ang mga opisyal sa buhatan sa gobyerno nga daghan og suod nga negosyante, matud pa ni Gutierrez.

Bisan ang mga empleyado nga nagserbisyo usab sa publiko, dili makalikay nga may mohatag kanilag pinaskohan, apan gumikan ning maong balaod dili sila makadawat niini.