Ginang gidul-ita'g pusil sa duha ka mga lalaki

Usa ka 49 anyos nga kusinera nga ginang ang gibanhigan sa duha ka wala mailhing mga lalaki samtang naglakaw diha sa dalan Saint Michael sa Banilad niadtong milabay'ng gabii.

Ang biktimang gidul-itan og pusil mao si Victoria Yap, 49, buwag sa bana ug kasamtangang nagtrabaho isip kusinera sa usa sa mga molupyo sa maong barangay apan lumad nga taga San Fernando.

Matud pang SPO3 Alex Dacua, duha ka wala mailhing lalaki luwan sa usa ka taxi ang kalit nga mibabag sa biktima diin ang usa mikanaog hinungdan nga nagdali og talikod si Yap aron modagan apan gigukod siya niini dayong dihang nakaduol gidul-itan og pusil ang walang aping niini.

Ang biktima human maigo nibarag ug nalup-og sa dalan samtang nagdali og balik sa nagpaabot nga taxi ang suspek ug daling miikyas palayo sa lugar.

Matud pang Dacua posibleng personal nga kaaway sa biktima ang suspek sanglit dili palang dugay dunay gikabangi nga katabang ang biktima ug gwardiya nga iyang kaubanan sa trabaho.

Gikatahong ang mga katabang ug gwardiya mibahad kaniya nga siya patyon apan wala pa matino sa kapolisan ang hinungdan sa pagbahad sanglit gisulod pa sa operating room ang biktima diha sa usa ka pribadong tambalanan.