Tubig sa Sogod ipasusi

Gobernador Gwendolyn Garcia nimando na sa dinaliang imbestigasyon sa pagtan-aw sa unsay klarong hinungdan sa pagkahugaw sa supply sa tubig sa Sogod Waterworks System.

Kini maoy gitug-an ni Atty. Pablo John Garcia ang consultant sa gobernador diha sa Kapitolyo.

Matud pa ni Atty. Pablo John nga ila nang gimanduan ang mga kadagkoan sa DOH-7 sa pag eksamen sa tubig sa Sogod ug usab nga dinaliang aksyon ang pagahimoon kay mga katawhan didto wa na malipay nga ang ilang tubig hugaw ug di maayong imnon.

Sa naunang imbestigasyon nagbutyag nga dunay daghan sa mga tawo sa Sogod ang nangadaut tungod sa maong tubig ug nasuta sa mga epedimiologist nga maoy unang nisusi nga positibo gayud ang tubig sa Sogod nga adunay coliform.

Gituohang hinungdan niini matud pa sa mga katawhan sa maong lungsod nga dunay tawo nga nagbinuang sa pagbutang sa hugaw kay sa gidugayon na wa man kini mahitabo nga ang ilang tubig may problema.

Tungod niini ang gobernador wa mahimuot sa maong report ug nimando gayud nga kini pagadalion ug sulbad kay kini nagdala man sa kinabuhi sa mga katawhan diha sa maong lungsod.