Nagmotor giatangan sa duha gipusil, drogas maoy gisubay sa PNP

Usa ka lalaking luwan sa usa ka motorsiklo ang grabeng naangol human kini pusila makadaghang higayon sa duha ka mga lalaking nagtaptap diha sa Villagonzalo 2, sa barangay Tejero ning dakbayan kagahapon sa kaadlawon.

Ang gipusil giilang si Redwin Tito, 22, walay trabaho ug residente sa maong lugar samtang luwas usab ang 13 anyos nga dalagitang miangkas sa iyang motorsiklo niadtong tungora.

Sumala pang SPO3 Alex Dacua sa Banat News giatangan sa duha ka suspek ang biktima diha sa maong dapit dihang mihunong si Tito kalit nga mibunot og wala matinong kalibre sa armas ang duha ka lalaki dayong pusil kang Tito makadaghang higayon.

Dali ra dayong midagan sulod sa mga gagmayng agianan ang mga suspek ug wala na igkita sa kapolisan samtang si Tito gidala sa Cebu City Medical Center ug gibalhin sa usa ka pribadong tambalanan tungod sa upat ka samad pinusilan niini sa iyang lawas.

Dugang pang Dacua nga nakadawat siya'g impormasyon nga posibleng may kalambigitan sa drogas ang motibo sa pagpamusil apan dugang pakisusi pa ilang himuon aron ikumpirmar kini.