Mandaue nay motutok sa summit

Cebu City posibleng mao nay mo-concentrate sa Sinulog Festival, samtang Mandaue ug Lapu-Lapu City motutok lamang sa subling pagkatakda sa ASEAN Summit karong sunod bulan.

Kini mao'y pamahayag ni Mandaue City Mayor Thadeo Ouano, kini ang mga posiblilidad nga mahitabo atol unya sa maong mga kalihukan sa unang bulan sa tiug 2007. Matud pa ni Ouano nga atol sa ilang panagtagbo sa mga sakop sa National Organizing Committee alang sa pagplastada sa maong posibleng kumplikasyon sa pagpangandam sa ASEAN summit ug sa tinuig nga selebrasyon sa Sinulog sa dakbayan sa Sugbu ug Mandaue.

Matud ni Ouano nga wa siya'y pagsupak sa pamahayag ni Cebu City Vice Mayor Mike Rama nga dili na sila manginlabot sa ASEAN gumikan kay mototok kini sa kalihukan sa umaabot nga Sinulog sa ikatulong Domingo sa bulan sa Enero.

Hinuon matud pa ni Ouano nga gamay nalang ang pagahimoon sa maong panagtagbo sa mga ASEAN Head of State gumikan kay 80% sa Ministerial Meeting ang natapos na sa milabay'ng simana human ang mga representante sa mga nasud ubos sa ASEAN nagkatigum.

Gisabot usab ni Ouano ang kahimtang sa dakbayan sa Sugbu kung ugaling doul ra ang gintang sa maong mga kalihukan gumikan sa kadaghan sa mga dumoduong gikan sa nagkadaiyang parte sa nasud nga mosalmot sa Sinulog ug dili basta-basta ang himuong preparasyon sa maong kalihukan ilabi na sa seguridad sa katawhan.

Daan ng napanglantawang dunay posibilidad nga kumplikasyon sa preparasyon sa maong mga kalihukan sa maong mga adlaw sanglit sa bag-ong petsang gitakda sa summit nga magsugod og Enero 11 ngadto sa 13 mao usab ang pagbukas sa usa ka semanang selebrasyon sa Sinulog dinhi sa dakbayan.

Daghang mga pasundayag nga himuon ug mga bangga sa mga contingents sa Sinulog sa kabataan ug uban pa nianang maong semanaha. Apan bisan paman niini daghang mga eksperto lakip na ang mga langyaw'ng mga tigpaniid nga kung molampos ang duha ka mga kalihukan mobunga kini og maayo sa ekonomiya sa Sugbo lakip na sa tibuok nasud.