Mao kiniy unod sa affidavit ni Arce nga iyang giduso ngadto kang City Treasurer Tessie Camarillo aron tubagon ang mga katarungan ni Ong nga namasangil kaniya nga maoy hinungdan sa iyang pagka-relibo gikan sa maong posisyon.
Subay sa detailed order nga giluwatan ni mayor Tomas Osmeña niadtong petsa 8 ning bulana gitangtang si Ong gikan sa Revenue Task Force ug gibalhin og distino sa Department of Public Services (DPS).
Apan nasayran gikan sa hepe sa DPS Engr. Dionisio Gualiza nga sukad niadtong petsa 8 ning bulana wala pa gyud mo-report si Ong apan igo lang kining niduso sa iyang buhatan kabahin sa bag-o niyang assignment.
Sa nahipos nga kasayuran, si Ong kasamtangan pang nagbakasyon ug giingong nagplano sad kining mo-resign human mapupos ang iyang bakasyon.
Si Arce maoy nireklamo kang Ong tungod sa paggamit niini sa multicab nga service sa treasurer's office bisan og dili oras sa ting trabaho.
Gitumbok ni Arce ang ilang gipahigayon nga operasyon niadtong petsa 1 sa niaging bulan sa Nobiyembre kon kalag-kalag diin nananghid sila nga maoy mogamit sa multicab nga service sa revenue task force apan wala kini ibilin sa garahian sa city hall hinungdan nga napugos sila og gamit og pribadong sakyanan aron pagtuman sa ilang gimbuhaton.
Apan naagian nila si Ong niadtong higayuna nga nagmaneho sa maong sakyanan nga dunay mga sakay nga pasahero.
Gitubag usab kini sa giduso nga affidavit ni Ong nga usa ka masakiton og naglisud paglakaw ang iyang gitabangan og gihatod sa pantalan aron pasakyon og barko niadtong higayuna.
Si mayor Osmeña sa iyang bahin nipadayag nga magpadayon ang maong imbestigasyon aron mahibaw-an ang kabalido sa reklamo batok kang Ong apan kon tinuod-on ni Ong ang plano niining mohawa sa trabaho gipadayag usab sa mayor nga posibling mahunong ang imbestigasyon.