Si Senior Inspector Ramon Villar, hepe sa intelligence and investigation section sa Mandaue City Police Office (MCPO) ang mipadayag niini sa Banat News sa follow up kagahapon.
Giila niya ang suspetsado nga mao si Hermis Abelgas, hingkod ang panuigon, lumad nga taga Ozamis City nga ang asawa lumad nga lumolupyo sa dakbayan sa Danao.
Matud pa ni Senior Inspector Villar nga si Abelgas maoy usa sa mga kauban sa pundok sa mga tulisan nga gikan pa sa Ozamis nga mokalit lang pag-anhi sa Sugbo ug manulis.
Si Raymond Alburo nga loan-in-charge maoy nag-ila sa suspetsado kinsa mao usab ang nakighinabi niini dihang misulod kini sa maong bangko nga nagpakaaron-ingnong kliyente.
Dugang pa niya nga ang habig na lamang ni Alburo ang ilang gipasakang kaso nga robbery batok sa suspetsado tungod kay ang tagdumala sa bangko nga si Benjamin Alfaro daw nagdumili man sa pag-abag kanila.
Matud pa ni Villar nga hayan ilang pasakaan og obstruction of justice si Alfaro sa gihimong pagdumili nga masulbad ang maong pagpanulis sa bangko niining gidumala.
Sumala pa niya nga ang pagdumili sa tagdumala sa bangko sa pagsulbad sa kaso daw nakapalig-on sa ilang katahap nga inside job ang maong panghitabo sa pagpanulis.
Gidudahang kagrupo ra sa banggiitang tulisan sa bangko nila ni Rey Torres ug Danny Limotan si Abelgas.