Manimbahay sa 'Misa de Gallo' angay'ng magbinantayon vs. kawatan

Gipahimangnoan sa kapolisan ang publiko nga dili modala og mga alahas ug ubang mahalong butang kun motambong sa unang Misa de Gallo karong adlawa.

Si Cebu City Police Office acting director Melvin Gayotin nanawagan sa publiko niini aron malikay sa posibleng pagpanulis o ba kaha pagpangawat diha sa mga simbahan.

Gipaabot nga magpunsisok ang mga Romano Katoliko diha sa nagkadaiyang simbahan sa dakbayan apan gipahimangno sa kapolisan nga di sab kalikayan nga magpunsisok usab ang mga kawatan.

Nunot niini ang CCPO nakigsabot na sa Parish Security Group sa simbahan kabahin sa ilang pagbantay samtang matag simbahan butangan usab og police action center aron maoy makaresponde ug makaabag sa mga manimbahay.

Matud pang Gayotin nga dako kaayo ang posibilidad nga ang mga kawatan ug tulisan matintal sa mga alahas nga suot sa mga manimbahay ug posible pa unyang magbutang sa peligro sa kinabuhi niini.

Samtang gipanghimakak ni Gayotin ang mga report nga duna nay nakasulod nga dagkong grupo sa mga tulisan dinhi sa Sugbo sanglit walay kumpirmasyong iyang nadawat kabahin niini.

Iyang gipasabot nga ang pagpahigayon nila kanunay og mga checkpoint pagpakita lang nga wala magpasagad ang kapolisan apan mihangyo siya sa mga magpapatigayon sa pagbantay sa ilang kaugalingong mga establisamento sama sa pagbutang og mga security alarm system ug gwardiya.