Bomba naigo sa bulldozer

Nakuykuyan ang usa ka vintage bomb sa world war 2 sa usa ka drayber sa bulldozer dihang nagbuldos sa yuta sa Aboitiz Subdivision sa Lagtang Talisay pasado alas 4 sa hapon sa miaging adlaw.

Si SPO2 Ceferino Camacho, head sa bomb disposal sa Cebu Provincial Police Office nga nahinabi sa Banat News kagahapon miingon nga nakadawat siya og report kabahin sa nakuykuyan nga vintage bomb sa nahisgutang lugar.

Daling mituyo og adto si Camacho uban sa iyang mga sakop ug nasuta nga ang maong bomba mahimo pa nga mobuto.

Gibutyag ni Camacho nga nahibulong ang tigbuldos sa yuta sa Subdivision dihang dunay miungot sa ilawom.

Matud niya ang maong vintage bomb kun pabuthon kini adunay 300 metros ang fatal radius ug 10 metros nga giladmon, ug aduna kini gitas-on nga 100 samtang 30 diametros ug 85 ang gilinginon.