Carbon walk tour ilusad karong Biyernes

Ilusad karong Biyernes sa hapon sa tanang mga dako og gagmay'ng negosyante nga anaa manginabuhi sa Carbon ang kalihukan niining Carbon Walk Tour nga tipik ug kabahin sa labing una nilang selebrasyon sa Pasko sa Carbon karung tuiga.

Sugdan ang maong kalihukan sa alas 5 sa hapon diin anha magtapok sa buhatan ni Bise Mayor Michael Rama sa City Savings Bank Building sa Osmeña Boulevard ug pagka alas 6:00 sugdan ang parada nga pagsuroy sa tibuok palibot sa Carbon.

Gitakdang mosalmot sa maong kalihukan ang United Multi Sectoral Coordinating Council of Cebu City (UMC4) ubos sa pagpangulo ni Bise Mayor Rama ug ingon man imbitado ang mga City Hall Beat Reporters nga mosalmot ug mo-cover sa maong kalihukan.

Ang tanang mga negosyante sa Carbon gikan sa nagkalainlaing stakeholder, nanag-iya og mga establisemento, stall-owners ug mga street traders magtambabayong paghimo sa maong kalihukan aron magmalampuson.

Tinguha sa maong pundok sa mga negosyante nga makakulit og kasaysayan sa ilang dugay-dugay na nga pagpanginabuhi diha sa Carbon Area.

Ang maong kalihukan magsilbi kining opening salvo sa gitakdang pagbukas sa "Night Market sa dalan Manalili" diin sugod karong petsa 21 hangtud sa petsa 24 og sa 28 hangtod sa sirad-an ang trapiko sa dalan Manalili aron paghatag og higayon nga maka-display sa lainlaing mga produkto ang mga manindahay sa Carbon sa maong lugar gikan sa alas 5 sa hapon hangtod sa alas 5 sa buntag.