Developer og yuta sa Lagtang gireklamo sa mga residente

Gipahigayong development project sa Aboitiz Land Inc. diha sa Barangay Lagtang dakbayan sa Talisay posibleng ipahunong sa kagamhanan sa siyudad kung dili kini mopatuman og mga paaging magsiguro sa kaluwasan sa mga residente.

Miduso og reklamo sa siyudad ang mga residente sa Sitio Quadra sa nahisgutang barangay tungod sa nahitabong pagbaha og lapok ug pagdahili sa yuta diha sa ilang lugar atol sa ting-uwan diin ang ilang gipasanginlan mao ang gipahigayong development project sa Aboitiz sa ibabawo'ng bahin.

Ang garden ni konsehal Benjamin Abatayo naguba usab sa maong baha.

Sa gipahigayong tigom niadtong Nobiyembre tali sa mga opisyal sa siyudad gibutyag ni Christine Homez, hepe sa City Planning Development Coordinator (CPDC) nga duna silay nakitang kalapasan sa Abotitiz kini base sa ilang gihimong imbestigasyon human sa nahitabong insidente niadtong Nobiyembre.

Ang CPDC mirekomendar sa Aboitiz og safety nets para malikayan ang laing insidente.

Ang kagamhanan sa siyudad mitukod usab og monitoring team para maoy mo-monitor sa proyekto kung ang developer mituman ba sa mga rekomendasyon.

Tulo ka adlaw gikan sa maong meeting, ang mga opisyal mipatawag og tigom tali sa Aboitiz diin ang maong problema maoy ilang gituki.

Si Charlie Cañete Project Manager sa BSP & Co., contractor sa proyekto, nagkanayon nga maglisod sila og butang og "safety net" sa Sitio Quadra apan nangita sila og laing paagi pinaagi sa pagbutang og balas sa mga yuta nga lugar para dili na kini mabahaan.

Si Annette Navarro representante sa Aboitiz Land Inc. mitataw nga giilisan na nila ang mga nagubang kabtangan sa mga residente.

Si Navarro miawhag usab sa mga residente sa lugar nga moduol ngadto kanila tungod kay andam silang mohatag og ayuda para masulbad ang problema.

Ang Aboitiz mihatag sa gipangayong bayad ni Rolando Martel residente sa maong sitio kinsa naapektohan usab sa insidente.

Si Martel nangayo og P250.00 matag adlaw hulip sa tulo ka adlaw nga absent niya sa iyang trabaho.

Gitataw ni Navarro nga sa wala pa ipahigayon ang proyekto ang Aboitiz nagbuhat og kanal dapit sa sapa sa lugar apan ang konstrusyon sa maong kanal nadugay tungod sa pagsupak sa ubang mga tag-iya sa lote.

Ang maong problema nasulbad na human ang Aboitiz mibayad sa right of way ngadto sa mga tag-iya sa lote.