Biktima ni Reming tabangan — Vidal

Gilusad kagahapon sa Artsidyosesis sa Sugbo ang kampanya aron tabangan ang sa mga biktima sa bagyo nga Reming nga miigo pipila na ka semana ang nakalabay sa Bicol Region.

Ang paglusad sa kampaya ang natigayon human usab sa pagpagawas og usa ka circular sa arsobispo sa Sugbo nga si Ricardo Cardinal J. Vidal.

Nunot sa maong circular nga giluwatan ni Cardinal Vidal, iyang gimandoan ang tanang parokya sa Sugbo sa paghimog special collection nga gitumong alang sa maong katuyoan.

Sa maong katuyoan ang simbahan hugtanong nagdasig sa mga Sugboanon ug sa pagpakita sa paghiusa pinaagi sa pagtampo aron makatabang sa mga biktima sa kalamidad.

Sa nasayran nga ang maong panawagan sa artsidyosesis maoy ikaduha na nga higayon sulod lamang sa upat ka bulan niining tuiga dihang ang kaulohan naigo usab sa bagyong Queenie ug Paeng sa milabay'ng Septiyembre.

Human sa maong duha ka bagyo nga mikalas ug mga kinabuhi ug nagmugna usab og kadaut sa kabalayan ug kabtangan sa katawhan ug kagamhanan, laing bagyo nga Reming ang miigo na usab sa Bicol Region ug silingan niining lalawigan.

Nagbilin usab kini og dakong kadaut sa mga kabtangan sa maong lugar ug daghan usab ang kinabuhing nakalas ug daghan pa ang nagpabiling nga natabonan sa midahili nga yuta.