500 ka raliyista nag-protesta

Gibana-banang dili mosobra sa 500 ka mga raliyista nga milusad og protesta kagahapon atol sa pagsaulog sa ika-59 nga kasumaran sa Declaration of Human Rights Covenant ang gibabagan sa kapolisan nga di makapaduol sa Malacañang sa Sugbo.

Ang mga raliyista gipanguluhan sa grupong Bayan, pinanguluhan ni Winnie Badayos uban sa mga sub-groups nga gilangkuban sa Anakpawis, Anakbayan, Kilusang Mayo Uno (KMU), RP-Australian Union Link ug uban pa.

Nagsugod ang panagtapok-tapok sa grupo alas 10 sa buntag diha sa Fuente Osmeña Rotunda ug mimartsa padulong sa Malacañang sa Sugbo.

Dunay pipila ka mga patrol cars ang misunod sa kalihukan aron pagsigurong luwas ug walay kasamok nga mahitabo sa maong kalihukan.

Apan diha palang sa eskina sa Osmeña Blvd. ug M.J. Cuenco gibabagan na sila sa usa ka platoon nga mga sakop sa Crowd Dispersal Management (CDM) sa kapolisan.

Dunay hamubo nga negosasyong nahitabo tali sa mga raliyista ug sa mga polis.

Ang grupo mipalanog sa ilang pagkondenar sa mga extra-judicial killings, political killings, gihulagway nilang "pagluto" sa Ubos Balay Balauranan nga makalusot ang Constituent Assembly (Con-As) ug ang kabahin sa kahimtang sa mga mamumuo.

Gikan sa M.J.Cuenco, mibalik sa agi ang mga militante sa dalan Colon diin ilang gitiwas ang pagdiskurso sa ilang buot ipalanog sa mga mulo batok sa gobyernong Arroyo.

Namatikdan sa kapolisan nga duna'y kinse ka mga langyaw'ng mga militante ang nikuyog sa maong kalihukan apan wala pa matino ang ilang mga pangalan ug nasyunalidad, apan usa lamang kanila ang nailhan sa mga polis.

Natapos ang lihok protesta ala 1:45 na sa hapon kagahapon diha sa dalan Colon.

Niadtong milabay'ng Biyernes sa kaadlawon, milusad og "Jog for Job and Justice" ang grupong Asia Pacific Research Network (APRN) gikan sa atubangan sa simbahan sa Asilo dela Milagrosa padulong sa Waterfront Hotel and Casino sa Lahug diin pipila sa mga delegasyon sa mga miyembrong nasud sa Asean mag-estar.

Militarisasyon, kahimtang sa mga mamumuo ug ang gihulagway nilang pagtamak sa katungod sa giilang militanteng labor leader ug abogadong si Brian Campbell sa Amerika kinsa gi-deport dayon human moabot sa Ninoy Aquino International Airport pila na ka adlaw ang milabay, si Campbell gikatahong moanhi sa Sugbo aron pagtambong sa "People's Protest" ug summit sa mga militanteng grupo sa kalibutan.

Atol sa maong sayong protesta sa Waterfront-lima ka mga langyaw ang nakit-ang mikuyog sa pundok ug nagdala og mga anti-government placards, nailhan na sa kapolisan kung si kinsa ang maong mga langyaw ug unsa ang ilang nasyunalidad.