Kini ang nasayran sa Banat News kang Cris Tero nga maoy bise presidente sa Looc Tricycle Operators and Driver Association (Lotoda) sa Looc, dakbayan sa Mandaue.
Matud pa niya nga ang mao nilang tinguha ilang gipaabot sa ilang adviser sa kahugpongan nga si Kapitan Editha Flores Cabahug kinsa mao usab ang mopaabot niini kang Mayor Thadeo Ouano.
Si Mayor Thadeo Ouano nga gikahinabi sa Banat News miingon nga pipila ka mga kahugpongan sa mga traysikol drayber sa dakbayan ang nakapadangat na niini sa iyang buhatan.
Ang maoy tinguha sa mga traysikol drayber ang iyang ipadangat ngadto sa National Organizing Committee sa Asean Summit kinsa mipadayag na sa paghatag og bugas gikan sa National Food Authority.
Kahinundoman si Ambassador Marciano Paynor kinsa maoy chairman sa national organizing committee sa 12th Asean Summit miingon nga ang mga drayber nga naepektohan sa ilang pagbiyahe ang mahimong kahatagan og hinabang nga bugas sa NFA.
Giklaro niya nga dili makahatag og salapi ang kagamhanan sa mga drayber sanglit makuwestiyon sa Commission on Audit (COA) ang paghimo niini.