Kagawad, misis 'naalsa' sa kaso sa BIR vs nila

Hugtanong gihimakak sa barangay kagawad sa Sawang Calero siyudad sa Sugbo ngasi Reynaldo "Rene" Jose ug sa asawa niining si Carolina ang kasong tax evasion nga gipasaka batok kanila sa Bureau of Internal Revenue (BIR) didto sa Department of Justice (DOJ).

Si Carolina personal nga mibisita sa buhatan sa The Freeman ug Banat News kagahapon sa udto aron tubagon ang ipadayag ilang habig kabahin sa nigawas nga balita sa Banat News niadtong niagi'ng adlaw nga gipasakaan sila og tax evasion sa DOJ.

Sa press statement nga giluwatan ni kagawad Reynaldo hangtod karon wala pa sila makadawat og kopya sa kaso nga gisang-at sa BIR batuk kanila og gani mipadayag siya og kaandam nga moatubang sa maong kaso og kun makadawat na sa kopya niini.

Gipasaninglan ni kagawad Reynaldo si Purita Suarez nga maoy gituohan nilang nagdaot sa ilang pagkatawo pinaagi sa pagpagawas og mga minao- mao nga impormasyon aron kini makabawos sa daghang mga kaso nga bouncing checks nga ilang gipasaka.

Gihimong basehanan ni Reynaldo ang kasong estafa nga ilang gipasaka sa korte batuk kang Suarez gumikan sa pag-isyo niini og mga checkie nga walay pundo og ni-untol.

Labaw nang gihimakak sa pamilya'ng Jose nga dili insakto ang kinatibuk-ang kita nga ilang gideklarar sa gidumala nga dormitories aron mogamay ang bayrana'ng buhis niini.

Base sa press release nga nadawat sa Banat News gikan sa BIR mikabat sa sobra sa 16 milyones ang tax deficiencies sa pamilya'ng Jose sa BIR sa tuig 2003 ug 2004.

Sa imbestigasyon sa BIR nasota nga nag-operate ang pamilya'ng Jose og lending firm ingon man foreign exchange nga wala marehistro sa BIR. Kini maoy hinungdan nga girekomendar sa BIR ang kasong tax evasion sa pamilyang jose sa DOJ.