Sundalo nag-checkpoint gidasmagan

Naangol ug nalandig sa tambalanan ang usa ka sundalo ug nadaot pa ang M14 rifle human kini madasmagi sa naghaguros nga minibus sa dihang nagbutang og signboard sa tunga sa kalsada kay nagpahigayon og checkpoint pasado alas 7 sa buntag kagahapon sa National hi-way, Pakigne, Minglanilla.

Ang biktima mao si PFC Arnel Quilapio, 24, minyo sakop sa Bravo Company sa 46IB sa 8th Infantry Division Philippine Army nga kasamtangan gi-augment sa nahisgutang lungsod alang sa Asean summit.

Samtang ang nakadasmag mao ang usa ka minibus nga gipanag-iya ni Eugene Sarucam sa San Fernando nga magbiyahean og Carcar ug nagtangag sa plaka GWX-207 nga gimaneho ni Cirilo Tenebrio Llanos nga taga Candagit, Sibonga.

Segun sa imbestigasyon ni SPO1 Romeo Parcon sakop sa Traffic Division sa Minglanilla nasayran nga si PFC Quilapio uban sa mga kauban ug mga sakop sa kapolisan sa maong lungsod naghimo og checkpoint isip tipik sa Oplan Sita.

Ang biktima maoy nagdala sa signboard nga dihay marka nga checkpoint aron ibutang sa tunga sa kalsada apan kalit lang gidasmagan sa sakyanan nga gimaneho ni Llanos ang biktima diha sa tunga sa karsada.

Misuway unta og dagan palayo sa lugar si Llanos aron moikyas apan nadakpan kini ni Corporal Mariano Lim nga mipahigayon og checkpoint sa unahan ug nasikop.

Samtang ang biktima daling gidala sa mga kauban nga sundalo sa usa sa mga tambalanan sa dakbayan sa Sugbo human makaangkon og samad ug bun-og sa kalawasan.

Si Llanos gitanggong na sa detention cell sa Minglanilla ug nagpaabot sa tukmang kaso nga ipasaka batok kaniya.