NBI andam na sa kalihukan sa Summit

Andam na ang Task Force Masid sa National Bureau of Investigation alang sa 12th Association of Southeast Asian Nations (ASEAN) summit sa Sugbo sunod semana.

Gipanguluhan sa special team sa mga agents, ang NBI ang manguha sa intelligence information sa pagpakig-alayon sa ubang law enforcement agencies aron malikayan ang posibling pagpangatake sa mga terorista.

Matud pa ni Atty. Ricardo Diaz, hepe sa NBI Criminal Investigation Division, nga ang ilang mga agents nagsugod na sa pagpahigayun og background checks sa mga establesemento, apil na sa mga staff sa mga hotels diin mamuyo ang mga delegado.

"This way, we could help ensure the safety of the ASEAN delegates," matud pa niya.

Ang NBI maoy kaabag sa gobyerno sa pagpatuman sa Task Force masid nga gipanguluhan sa Philippine National Police Criminal Investigation and Detection Group.

Gibana-banang moabot sa 3,000 ang mga delegado sa summit nga langkuban sa mga heads of states ug mga ministro sa trade, investments, energy, education, culture ug security gikan sa ASEAN ug 2,000 ka mga foreign journalists ang mosalmot sa kalihukan.

Ang kagamhanan nipasalig sa paghatag og igong seguridad sa mga delegado nunot sa hulga sa mga terorista nga gikan sa Mindanao.