Ang mga tawo sa maong dapit nga bag-uhay lang naigo sa bagyong Reming diin gatusan sa mga residente ang natabunan ug minilyon ang nadanyos, wala magduha-duha sa pagdinaganay, pagpangita og taas nga dapit sa ilang lugar aron maluwas sa giingong nagpadulong nga tsunami.
Bitbit ang ilang mga anak ug mga kabtangan nagdinagay ang mga tawo diin ang uban nangasamdan pa tungod sa mga mahait nga nagkatag nga mga butang diha sa palibot ug sa lawom nga mga lapok aron lang makapalayo sa ilang lugar.
Apan dangtan ang pila ka oras, natapos na ang adlaw walay tsunami nga miabot sa ilang lugar. Ang maong lungsod walay baybayon kay wala kiniy dagat.
Diha na mikalma ang mga residente, dihang mismong ang awtoridad na ang mipahibalo kanila nga walay susamang trahedya nga mahitabo sa ilang lugar.
Nasuta nga gikan ra kadtong maong impormasyon sa mga tawong walay laing lingaw kundili ang hadlukon ang mga residente.
Gipahimangnuan sa mga National Disaster Coordinating Council ang katawhan nga dili mohimo og susamang komedya gumikan kay wala pa makarekober ang mga residente sa trahedyang miigo kanila niadtong milabayng semana.