Notadong pusher sa Lapu gisikop

Notadong drug pusher sa dakbayan sa Lapulapu nasikop atol sa ronda nga gihimo sa kapolisan sa maong dakbayan kagahapon sa kaadlawon.

Ang nasikop mao si Santos Lopez Jr. alyas Junjun, nagpuyo sa St. Anthony's Village, Sitio Sangi, Pajo, Lapulapu.

Matud pa ni SPO3 Mario Poblete ang nangulo sa maong pagpangronda, nga dugay na nilang nasayran nga namaligya og shabu si Lopez ug sa ilang gihimong pagpaniid na positibo kini hinungdan nga mi-aplay sila og search warrant (SW) ngadto kang Lapulapu City Regional Trial Court branch 27 Judge Geraldine Faith Econg.

Human miluwat og search warrant si Econg niadtong Nobiyembre 30, 2006 kagahapon sa buntag pormal nga gipatuman sa mga sakop sa Operations Division, SWAT ug Philippine Drug Enforcement Agency-7 ang pagronda sa balay ni Lopez.

Atol sa pagronda, gisaksihan kini ni Emil Ladera, barangay secretary sa Pajo ug tulo ka mga tanod ug nakuhaan kini og ubay-ubay'ng mga ebidensiya.

Nakuha sa lawak ni Lopez ang 14 ka gagmay'ng pakete sa gituhoang shabu, kagamitan sa pagrepake ug paggamit sa shabu, cellphone, motorsiklo ug salaping cash nga mobalor og P5,395 nga gituhoan nga halin sa pagpamaligya og ilegal nga drugas.

Lakip sa nakita sa kapolisan mao ang UHF radio base, kumpletong uniporme sa militar, samtang ang lawak sa iyang amahan nga si Santos Lopez Sr. walay nakitang ebidensiya sa drugas.

Si Junjun Lopez kasamtangan nabalhog sa prisohan sa Lapulapu ug pasakaan kini og kasong kalapasan sa R.A 9165 ngadto sa korte.