Hangyong rice subsidy sa Nadsu gisalikway

Yano ra kaayong gisalikway ni Mayor Tomas Osmeña ang hangyo sa Nagkahiusang Drayber sa Sugbo (NADSU) nga hatagan ang mga sakop nilang drayber og rice subsidy sa siyudad nga apektado sa ipatuman unyang rerouting ug pagpasira sa mga kadalanan atol sa pagpahigayon sa 12th Asean summit karong Disyembre 11 ngadto sa 14.

Atol sa press conference kagahapon sa udto gi-prangkahan ni Osmeña nga dili gyud mahitabo nga mohatag siya og ayuda sa mga drayber nga sakop sa Nadsu.

Padayong nagdumot si Osmeña sa mga sakop sa Nadsu tungod sa padayong pagsupaksupak niini sa mga gipatumang polisiya sa dakbayan nga miresulta sa pagpasaka niini og kaso sa korte batok sa dakbayan.

Kini may labot sa pag-kuwestiyon sa NADSU sa legalidad sa pagpatuman sa Citom sa City Ordinance 1837 nga nagdili na sa mga PUJ sa Mandaue nga makalahos og pamasahero sa Osmeña Boulevard ug Colon area.

Ang Nadsu nihangyo sa siyudad nga hatagan og rice subsidy ang mga drayber nga maapektuhan sa pagsira sa mga kadalanan atol sa Asean summit gumikan kay duna kini tagsatagsa ka pamilya nga nagsalig sa ilang adlaw adlaw nga pangita.

Apan matud ni Osmeña sayop ang mayor nga giduol sa Nadsu aron pangayoan og tabang gumikan kay wala gyud kini mapaabot nga ayuda.

Hinuon si Mayor Thadeo Ouano sa Mandaue mipasalig na nga motabang sa gipangayo nga rice subsidy sa mga apektadong drayber pinaagi sa iyang pagrekomendar niini ngadto sa national organizing committee sa Asean Summit. - Darrel A. Carumba