Kuwentas sa patron sa Argao gikawat

Nag-inusarang kawatan mikawat sa kuwintas sa imahen ni Sr. San Miguel, ang patron sa Argao human gibuak ang bildo dihang gihapak og tipaka sa semento. Nahitabo kini pasado alas 5 kagahapon sa kaadlawon diin gibutang sa gawas sa simbahan ang rebolto sa maong santos.

Apan hangtod karon wala pay nailhan ang kapolisan nga responsable sa pagkuha sa kuwentas sa rebolto hinuon padayon pa ang ilang gihimong pakisusi kalabot niini.

Ang kuwintas nga bulawan gipanag-iya ni Msgr. Jose Montecillo kinsa maoy kura paroko sa nahisgutang lungsod

Gibana-banang mokabat sa P40 mil ang kantidad sa bulawan.

Segun sa report, ang kuwintas gitaod kini sa pari sa ngadto sa rebolto dihang siya nahimong monsenyor pipila na ka tuig ang nakalabay human siya giregalohan sa usa ka deboto.

Nagtuo ang kapolisan nga naratol ang kawatan kay nahibilin man ang pulseras nga gitaod sa usa ka bukton sa maong santos ug wala kini maapil og kuha.

Apan nabuak ang espada nga gikuptan ni Sr. San Miguel nga naigo sa tipaka sa semento.

Si SPO1 Edwin Miranda nga nahinabi sa Banat News miingon nga dihay usa ka tawo ang nag jogging duol sa simbahan nga igo lang milabay, apan nakadungog kini nga nipiti ang urna sa bildo ni Sr. San Miguel

Nakita na lang sa maong tawo nga mikaratil og dagan ang wala mailhing kawatan paingon sa nag-parking nga bisiklita ug misutoy og padagan palayo sa maong dapit.

Nagduda ang maong tawo na nag-jogging hinungdan nga daling miadto sa kumbinto aron magpahibalo sa iyang nakita.