Dakong multa vs. dispatser sa PUJs mao ray sulbad

Mga polis ray bantayan ug gamay ra kaayong multa nga silot sa mga dispatser maong dili gihapon sila mahipos diha sa kadalanan bisan paman duna nay mga gipangdakop kanila.

Kini maoy namatikdan sa mga polis kung ang hisgutan mao ang mga dispatser sa dakbayan sa Sugbo, nga karon mao nay naghari-hari diha sa kadalanan.

Ang plano ni Konsehal Raul Alcoseba nga padak-an ang multa sa madakpang distpatser gikan sa P200 ngadto na sa P5,000, dili makaani og pagsupak gikan sa habig sa kapolisan.

Sila si Sr.Inspector George Ylanan ug Sr.Inspector Alexis Relado sa Cebu City Police Office mihangop sa maong plano tungod kay makadaghan ng higayon nga ang ilang mga units maoy mohipos sa mga dispatser, apan mahibulong nalang pagkasunod ugma mamalik nasad sa kadalanan.

Ang mga dispatser gipangreklamo na sa mga drayber tungod sa ilang "walay pugsanay, apan walay balibaray" nga pagpangilkil sa kahadlok nga sila maoy hilabtan, wala nalang nila kini pormal nga gireklamo sa kapolisan.

Duna pay mga insidente nga bastos ang mga dispatser, diin ang mga babayeng pasahero ilang tultulan sa pultahan apan ang ilang kamot anha na mogunit sa hawak o ba kaha sa mga lubot sa mga babayeng pasahero.

Apan tungod usab sa kahadlok, luomon nalang sa mga babaye.

Dugang pa niini ang daghan nga insidenteng ang mga distpatser manunggab na og mga kundoktor ug drayber tungod kay P2 ra ang gihatag.

Matud pang Ylanan nga kung mapatas-an ang multa ang mga dispatser nga madakpan magduha-duha na og usab sa ilang nahimo ug kadtong wala pa madakpi dili nalang gyud mobalik sa ilang operasyon.

"Mas maayo nuon na nga dak-an ang multa kay magduha-duha na na sila og balik, kay magsige-sige man gud na sila og balikbalik bisan kapila nga madakpi, gamay ra lagi ng multa," asoy pang Ylanan.

Matud pang Ylanan nga dili man mahimong ang mga dispatser nalang ang ilang kanunayon og dakop sanglit duna may mas seryosong mga krimen nga ilang trabahuong masulbad.

Samtang si Relado sa iyang bahin mitug-an nga ang paghikay sa kaso sa mga madakpang dispatser molanat og tagtunga ngadto sa usa ka adlaw apan pag-abot sa korte pahangyuon ra sa multa hinungdan nga makagawas ra dayon.

Sa plano ni Alcoseba, gawas sa P5,000 nga multa prisuhon sad sila ug dili molapas sa unom ka bulan imbes nga kinse ra ka adlaw.