Mga langyaw'ng peryodista naabot na

Nangabot na ang pipila ka langyaw'ng peryodista nga mo-cover sa 12th Association of Southeast Asian Nations summit sunod semana sa Sugbo.

Ang mga foreign journalist nagpahimutang na sa ilang mga kahimanan sulod sa Cebu International Convention Center alang sa kalihukan sa mga Asean Leaders.

Hangtud sa pagkutlo ning balita kagahapon sa hapon, matud pa ni Gob. Gwendolyn Garcia nga wala pay nakahinabi kaniya nga mga foreign journalists sa iyang pagbisita sa CICC.

Si Garcia mobisita sa CICC ka upat sa usa ka adlaw aron pagseguro nga andam na ang tanang kahimanan sa Summit bisan gidumala na kini sa National Organizing Committee sukad niadtong Sabado.

Ang mga foreign journalists sayong nangabot sa Sugbo gumikan sa mag-unang kalihukan nga mao ang Asean Business and Investment Summit nga ipahigayon karong petsa 7 hangtud 10 ning buwana sa Waterfront Cebu City Hotel.

Gawas sa Asean-BIS, daghan nang tigum nga ipahigayun sa dili pa ang Asean Leaders' Summit sa petsa 11 hangtud 13.