Ang gidakop giilang si Lester Trocio, 24, nga taga dalan Don Pedro Cui sa San Antonio ning dakbayan kinsa nakuhaan usab og usa ka paketeng shabu dihang gisikop sulod sa usa ka imnanan sa City Center sa Kamagayan ning dakbayan niadtong Sabado sa buntag.
Usa ka Joan Galanza, 31, ang mireklamo batok sa suspek nga maoy mikawat sa iyang Aiwa stereo cassette nga nagkantidad og P5,000 diha sa Faithful Street sa Hipodromo ug diha na kini marekober kang Myrna Ramos diha sa maong dapit.
Nakadawat og impormasyon si Inspector Bastes kabahin sa presensya ni Trocio diha sa nahisgutang barangay nga nakig-inom uban ang mga higala hinungdan nga ila kining gisusi.
Tuod man si Trocio giaresto sa mga sakop sa TRS ug sa dihang girekisa ni PO1 Roxam Enrio, nakuhaan pa kini og usa ka paketeng shabu.
Si Trocio miangkon nga siya maoy mikawat sa butang ni Galanza ug iya kining giprenda kang Ramos og P1,000.
Matud pang Bastes, si Catostos notado na kaayong kawatan nga manulod og mga balay dinhi sa dakbayan. Dugang pa ni Bastes duna pay laing lima ka mga biktima ang positibong miila sa suspek nga maoy mikawat sa ilang mga butang ug gikatakdang mopasaka usab og kaso karong adlawa.